2011 йил 28 апрел
Ҳар йили 3 май куни нишонланадиган Халқаро сўз ва ахборот эркинлиги куни муносабати билан ЭОАВМА, Ўзбекистон журналистлар ижодий уюшмаси, Фонд Форум, “Келажак овози” ЁТМ, ЕҲҲТ, К.Аденауэр номидаги жамғарма, БМТ Тараққиёт дастури, UNESCO, UNFPA 28 апрелдан 3 майга қадар медиа кунларини ташкил этишди. “Нодавлат электрон ОАВ эфирларида медиаконтент даражасини ошириш масалаларида нодавлат нотижорат ташкилотлар, ЭОАВМА ва халқаро институтларнинг ўзаро таъсири” мавзусига бағишланган медиа форум мазкур кунларнинг илк тадбирига айланди. Тадбир доирасида ўтказилган мунозараларда ёш журналистлар, ҳудудий нодавлат нотижорат ташкилотлар вакиллари, ёшлар телестудиялари, ёшларга мўлжалланган матбуот ва интернет нашрлар вакиллари иштирок этишди. Медиа-кенгаш раиси Гулнора Каримова бу йил “Асрлар садоси” анъанавий маданият фестивали доирасида ўтказилаётган “Журналистлар баҳори” танлови ғолибларини тақдирлади.
Форум-ТВ халқаро телеканали видеотақдимотидан сўнг замонавий жамиятнинг ривожланиш босқичлари ҳамда ёшлар манфаатлари билан уйғун тарзда медиа-майдонни такомиллаштириш мавзуси ўртага ташланди. Бутун дунё телетомошабинлари учун Ўзбекистон имижини янада юксалтириш учун нима қилиш керак? Маҳаллий телеканалларга янада кўпроқ ёшларни жалб этиш учун қандай саъй-ҳаркатларни амалга ошириш даркор? Журналистикадаги қандай жанрлар бугунги кунда энг долзарб ҳисобланади? Маҳаллий ОАВ соҳасида қандай мутахассислар етишмовчилиги мавжуд? Бу ва бошқа саволлар “UzEXPO” биносига йиғилган иштирокчилар ўртасида муҳокама қилиниб, медиа-форумнинг жонли, очиқ ва эркин ўтиши учун замин яратди. Келгуси режалар бўйича қатор янги ғоя ва таклифлар киритилди.
Форум якунларига кўра “Журналистлар баҳори” медиа танлови ғолибларини тақдирлаш маросими бўлиб ўтди. Танловнинг асосий мақсади ўзбек халқи миллий анъаналари ва маданиятини ёритаётган ходим ва журналистларни махсус диплом ва қимматбаҳо совғалар билан тақдирлашдир. Медиа-кенгаш раиси Гулнора Каримова Шахноза Ғаниева ва Дилбар Бабажанова, ҳамда ҳудудий телестудиялар вакилларига совринларни топширди.
Медиа кунлари доирасида қатор қизиқарли тадбирлар ўтказилиши режалаштирилган. Хусусан, АҚШ элчихонаси ва ЕХҲТ билан ҳамкорликда “National Geographic” телеканали мураббийининг “Фан, табиат, маданият ва санъат ҳақидаги медиаконтент яратишда журналист ва операторларнинг касбий малакасини ошириш” мавзусига бағишланган семинар-тренинг ташкил этилади. Унда Форум-ТВ, ТВ-Марказ, ЎзНТТ, “Ўзбекфильм” ва ушбу йўналишга ихтисослашган бошқа ОАВлари вакиллари иштирок этишади. UNFPA ва UNESCO кўмаги остида ўтказиладиган “Соғлом турмуш тарзи тарғиботи” семинар-тренинги ҳудудий ОАВ ва радиостанцияларнинг ёш журналистларига бағишланди.
2 май куни К. Аденауэр жамғармаси билан ҳамкорликда “ЭОАВМАнинг Сўз ва ахборот эркинлигини таъминлаш масалалари борасида халқаро институтлар билан ҳамкорлиги” мавзусида давра суҳбати бўлиб ўтади. Давра суҳбатини ўтказишдан мақсад ахборот соҳасини ислоҳ қилиш, ахборот ва сўз эркинлигини таъминлаш соҳасида мамлакатимизда демократик ислоҳотларни янада чуқурлаштириш ва фуқаролик жамиятини ривожлантириш концепциясини амалга ошириш масалаларини муҳокама қилишдир. Давра суҳбатида давлат идоралари, фуқаролик жамияти институтлари вакиллари, ҳудудий телерадиостанциялар раҳбарлари ҳамда мамлакатимизда рўйҳатдан ўтган халқаро ташкилотлари вакиллари, хорижий экспертлар (К. Аденауэр номидаги жамғарма бошқарув аъзоси Беттина Аденауэр-Биберштайн ва германиялик таниқли публицист Штефан Граф Финк фон Финкенштейн) иштирок этишади.
Мавзу бўйича янгиликлар
Гулнора Каримова – Ёшлар Медиа Кенгашининг фаҳрий раиси