2010 йил 18 октябр
18 октябрь куни Тошкентда Гулнора Каримова ташаббуси билан Сиёсий тадқиқотлар институти, Конрад Аденауэр номидаги жамғарма ҳамда «Tethys Petroleum Ltd.» (Канада) ва «ITE Uzbekistan» компаниялари томонидан ҳамкорликда ташкил этилган “Мунозаралар клуби”нинг тақдимот маросими бўлиб ўтди. Мунозаралар клуби хорижий ва ўзбек экспертлари ўртасидаги муносабатларни янги поғонага кўтариш, Ўзбекистоннинг сиёсий-иқтисодий мактабини ривожлантиришга ҳам назарий, ҳам амалий жиҳатдан ўз таъсирини ўтказиши мумкин бўлган янги ғоя ва қарашларни юзага келтириш учун асос бўлиб хизмат қилиши кутилмоқда.
Тадбирда чет эллик ва маҳаллий экспертлар, хорижий ташкилотлар, дипломатик корпуслар, мамлакатимиз вазирлик ва идоралари вакиллари иштирок этишди.
Асосий маърузаларни махсус таклиф этилган меҳмон Бертольд Бейтц номидаги марказ тадқиқот дастурлари директори, Россия, Украина, Белорусия ва Марказий Осиёни ўрганиш бўйича малака ошириш маркази, Германия ташқи сиёсат жамияти директори профессор Александр Рар ўқиди. У ўз чиқишида Европа сиёсати ва халқаро муносабатларнинг замонавий тизими мавзусига алоҳида тўхталди.
“Мунозаралар клуби” чоғида жаҳон иқтисодиёти ва сиёсати билан боғлиқ қатор масалалар муҳокама этилиб, жумладан, Европанинг АҚШ, НАТО билан ҳамда трансатлантик ҳамкорлик истиқболлари, Афғонистонга қаратилган сиёсат, афғон омилининг НАТО ва трансатлантик ҳамкорликка таъсирига эътибор қаратилди.
Шунингдек, Европа-Хитой ва Европа-Россия муносабатларини ривожлантириш масалалари ўртага ташланди. Европа ва Марказий Осиё ўртасидаги ҳамкорлик таҳлили ва истиқболлари, ушбу икки минтақанинг нефть-газ, энергетика соҳасиларининг бугунги ҳолати ва истиқболлари ҳам клуб иштирокчилари томонидан қизғин муҳокама қилинди.
Экспертлар ҳамжамияти халқаро сиёсатдаги пировард муаммолар ва уларни ҳал этишнинг самарали йўлларини ишлаб чиқишда “Мунозаралар клуби” ҳиссасининг беқиёс бўлиши кутилаётганини айтишди.
Сиёсий тадқиқотлар маркази томонидан йўлга қўйилган “Мунозаралар клуби” бугунги кундаги қатор долзарб муаммоларни ҳал этишнинг янги тамойилларини ишлаб чиқиш жараёнига сезиларли таъсир кўрсатишга қаратилган. Иштирокчилар мазкур лойиҳанинг келажакда муваффақият билан ҳаётга тадбиқ этилиши ва ривожланишига ишонч билдиришмоқда.
Мавзу бўйича янгиликлар
Ўзбекистоннинг маданий мероси: ҳаттотлик ва меъморий эпиграфика санъати илмий анжуманини