2010 йил 18 ноябр
Пойтахтимиз аҳли ва уста-ҳунармандлар “Bazar-Art” кўргазма-ярмаркасини ҳар сафар интиқлик билан кутишади. Бунинг боиси — айнан мана шу лойиҳада мамлакатимизнинг турли чеккаларида истиқомат қилувчи амалий санъат усталари ўз қўл меҳнати асосида табиий хом-ашёдан яратган ранг-баранг маҳсулотларини кўргазмага қўйишади. 16-18 ноябрь кунлари Миллий санъат марказидаги расталарда каштачилик, тўқимачилик, тикувчилик маҳсулотлари, турли хомашёлардан ўйиб ишланган, нақш туширилган буюмлар, кулолчилик, заргарлик маҳсулотлари ва бошқалар санъат ихлосмандлари эътиборига ҳавола этилди. 18 ноябрда эса натижалар сарҳисоб қилиниб, энг фаол иштирокчилар Гулнора Каримова томонидан тақдирланди.
Лойиҳа ташкилотчилари — Фонд Форум ҳамда «IJOD» рассомлар, санъатшунослар ва халқ усталари уюшмаси бу йил асосий эътиборни кулол ва тикувчилар сулолаларига қаратишди. Айтиш жоизки, мазкур кўргазма-ярмарка анъанавий ва замонавий амалий санъат соҳасидаги ижодий салоҳиятни юзага чиқариш, ушбу соҳадаги ахамиятли ўзгариш ва янгиликлар билан кенг жамоатчиликни таништириш, ижодкор сулолалар ва истеъдодли ҳунармандларни қўллаб-қувватлаш ҳамда миллий меросимизни асраб-авайлашга қаратилган.
Қолаверса, лойиҳа Ўзбекистондаги миллий амалий санъатнинг бугунги кундаги аҳволини ўрганиш, унинг йўқолиб кетаётган йўналишларини қайта тиклаш ва ривожлантириш имконини беради. “Bazar-Art” доирасида ҳунармандлар ва уларнинг шогирдларига грантлар ажратилиб, мазкур грантлар амалий санъатни янада ривожлантириш, ҳунармандчиликнинг йўқолиб бораётган турлари ва анъанавий шаклларни қайта тиклаш каби эзгу мақсадларни кўзда тутади.
Мавзу бўйича янгиликлар
Амалий санъат усталари ва ёш аёлларга грантлар топширилди