2011 йил 27 октябр
Art Week Style.uz -2011 санъат ҳафталигининг бешинчи куни мода оламининг дунё тан олган вакиллари – Roberto Cavalli, Gianfranco Ferré, Angel Schlesser либослари намойиши билан юрдошларимиз ва пойтахтимиз меҳмонлари ёдида қолди. Тошкент саҳнасида итальянча услубга хос бўлган нозик бичимлар, мўйна, теридан тикилган либослар қад ростлади. Кунни таниқли америкалик стилист Кит Брюстер томонидан ўтказилган унутилмас маҳорат дарси давом эттирди. “MEROS” Ўзбекистон антикварлари уюшмаси Буюк Британиянинг дунёдаги энг йирик “CHRISTIE`S” аукцион уйининг ислом маданияти бўлими билан ҳамкорликда ўтказган аукционга ўзбек амалий санъатининг чинакам иҳлосмандларини йиғди. GULI заргарлик бренди тақдимот-қабулида эса заргарлик санъати ҳақиқий намуналарининг кўзни қамаштиргувчи гўзаллиги бу кечада осмондаги юлдузлардан-да ёрқинроқ чақнади.
Ҳафталик бешинчи кунининг биринчи намойишини Миллий санъат марказида Испаниянинг Angel Schlesser бренди бошлаб берди. Рангин жилолари билан томошабинларни мафтун этган ушбу замонавий тўплам ҳашам ва сиполик, миллийлик ва замонавийликни уйғунлаштирган. Саҳнада романтик ва жиддий, кундалик ва байрамона либослар, фируза, сариқ, кўк, пушти ҳамда оқ-қора рангдаги устки кийимлар бирин-кетин намойиш этилди.
Италиянинг афсонавий Gianfranco Ferré мода уйи Ёшлар ижод саройи саҳнасида тақдим этган дефиле мода олами тарихига зарҳал ҳарфлар билан ёзилса, ажаб эмас. 2011-2012 йилларнинг куз-қиш мавсумига бағишланган бетакрор ва бежирим 18 либосни ҳақиқий санъат намунаси, десак бўлади. Кечки либослар, юпка ва баланд ёқали, енгсиз кофталар намойишнинг бош қаҳрамонларига айланишди.
Мода олами мусаввири Роберто Кавалли либослари тўплами намойиши эса аншлагга айланди. Йиғилганлар ҳақиқий итальянча ҳашаматнинг гувоҳи бўлдилар. Асосан тўқ қўнғир, гилосранг ва оч жигар ранглардаги мўйна ҳамда тери хом-ашёсидан тайёрланган устки кийим, сумка, камзул ва байрамона либослар тўпламнинг бетакрор намуналаридир. Аксессуар ва либоснинг айрим қисмларига тилларанг зарларда берилган безаклар уларга башанглик ва жозиба бағишлаган.
Буюк Британиянинг дунёдаги энг йирик “CHRISTIE`S” аукцион уйи ислом маданияти бўлими билан ҳамкорликда “MEROS” Ўзбекистон антикварлари уюшмасидан анъанавий кимошди савдоси бўлиб ўтди. Уни британиялик таниқли аукциончи Эдвард Райзинг олиб борди. Аукционнинг бош лоти сифатида Ўзбекистон анъанавий ва амалий безак санъати намуналари тақдим этилди. Тушган маблағ Ўзбекистон маданий-тарихий меросини ўрганишга қаратилган “MEROS” уюшмаси томонидан олиб бориладиган тадқиқотларга сарфланади. Мазкур тадқиқот жараёнига археолог, тарихчи ва олимлар, шунингдек, Ўзбекистон олий ўқув юртларининг тарих факультетлари талабалари, ёш мутахасислар жалб этилган.
Бешинчи куннинг кечки тадбири ўзгача муҳитда ўтди. Guli заргарлик бренди тақдимот-қабулга кўплаб меҳмонлар, шу қаторда атиргул барглари қатида пинҳон ялтираётган ҳақиқий заргарлик санъати намуналарининг асл ихлосмандлари ташриф буюрди. Guli бренди Шарқ ва Ғарб анъаналарини ўзида жо этган нозик заргарлик буюмлари, тақинчоқ ва зеб-зийнатлари билан донг таратган.
Мавзу бўйича янгиликлар
Art Week Style.uz-2010 – оламнинг “бешинчи ўлчам”и